الخلوة بالذات
لم أكن متيقنة من قدرتي على العودة للكتابة بنهم، كانت فترة مليئة بخمول كتابي أو توقف انهمار للأفكار، لكن الأسبوع الماضي اثبت لي عكس ذلك، كمية الأفكار التي عشتها واحتجت كتابتها بلحظتها عديدة! لدرجة أني كتبت أكثر من ٢١ ملاحظة بملاحظات هاتفي، غير الأفكار الورقية! اللهم بارك، عندما ادخل بمرحلة خمول الأفكار اختلي بذاتي، ربما تكون الخلوة مع الذات مفتاح للعديد من الأمور، أولها معرفة النفس، وآخرها استقرار للمشاعر بشكلٍ عجيب
كنت ساتحدث في هذا البوست عن موضوع الصدفة، لكن يبدو أنِّ سأأجله واتحدث عن ( كيف اختلي بذاتي؟ )
لنبدأ بـ لماذا؟
- سأتحدث بالعامية -
"ليش؟" هذا سؤالي المفضل لمن يعرفني
"ليش أبي أسوي هالشي؟"
معرفة السبب يسهّل الطريق ويسهّل الالتزام به، بس أكون محتارة من اتخاذ قرار اسأل نفسي ليش؟ ليش أبي اسويه؟ وليش مابي أسويه؟ لما أعرف السبب انتقل لسؤال ثاني يعلمني شلون ابلش
بس الحين...
ليش اختلي بذاتي؟ شنو معنى الخلوة مع النفس؟
كثر ماعرفنا نفسنا وقعدنا معاها وحددنا نقاط قوتها ونقاط ضعفها كثر مانفسنا راح تعطينا و توسع علينا مشاعرنا، كثر ماعطينا نفسنا من داخل قدرنا نعطي للناس.
هالشي يعلمنا معنى الأُنس، وجود ناس بحياتنا نرتاح لهم ونحب نقعد معاهم يعني إن احنا نحس بالأُنس بوجودهم، شلون لو كان هالأُنس تجاه ذواتنا؟ شلون لو كان هالحب من نفسنا لنفسنا بالبداية؟ شلون نسولف مع أقرب شخص بحياتنا وقت وناسته؟ وقت زعله؟ جذي نتكلم مع نفسنا، أصيغها بطريقة أبسط؟ الله، ثم أنا، ثم الناس.
أهم هدف عشان نعرف ليش نختلي بالذات، كثرة المدخلات بحياتنا، كثرتها تسبب تشتت وضياع لبوصلة حياتنا، الخلوة بالذات تنظم هالمدخلات وتعيد ترتيب الأولويات وتوّضح الرؤية، الخلوة لها طرق مختلفة، جربت أنواع مختلفة واخترعت أنواع تناسب نمط حياتي، التجربة بالبداية هي اللي تعلمنا شلون نختار نمط الخلوة اللي يناسبنا، بس بالبداية نختلي واحنا عارفين الـ ليش.
من الأشياء اللي ساعدتني اضيف هالعادة لحياتي، الـ social media detox شوفو قناة نوف حكيم باليوتيوب عن الموضوع.
و بالنسبة لي، محاسبة النفس سبب ضفته لأسباب الخلوة بالذات، محاسبة الذات مهمة أسبوعية، شهرية وموسمية بالنسبة لي، إن تكلمت عنها بندش بموضوع ثاني، بس حاليًا معتمدة على الخلوة عشان تساعدني بالمحاسبة.
"( كيف ) اختلي بذاتي"
بعد الـ ليش نوصل لسؤال شلون؟ "شلون اختلي بذاتي"
هالسؤال راح يعلمنا الخطة اللي راح تساعدنا نوصل للهدف، بالنسبة لي لازم يكون عندي وضوح حق هدف جلسة الخلوة، الخلوة ترتيب للأفكار؟ المشاعر؟ حل مشكلة؟ التفكر؟ كل وحدة منهم تختلف طريقة تعاملي معاها، لكن عندي خلوة يومية مثبتتها من سنين، كنت اسميها ساعة الطاقة بعدها صارت الساعة البكورية، المسميات اختلفت والهدف واحد لكن طريقتي فيها بسيطة.
هدف الخلوة اليومية:
- صلاة وذكر لله وقرآن
- كتابة أفكار ومشاعر اللحظة
- التفكر بتصرفات الأيام الماضية ، إضافة جديدة
- قراءة أهداف اليوم ( غالبًا اكتبهم قبل النوم )
تاخذ مني من ٣٠-٩٠ دقيقة من يومي
طريقة الخلوة بالذات:
- اختار وقت محد يقاطعني فيه، غالبًا بعد صلاة الفجر من ساعة لساعتين
- نوت وقلم
- بدون أجهزة الكترونية أو مع بس بدون ميديا
- اقعد بروحي وأنا عارفة الهدف وواعية بمشاعري
وإذا كنت بفترة مشاعري فيها نازلة، أرد لطريقتي بـ "شلون أعرف نفسي" عشان اختلي بذاتي
بشاركها معاكم قريب إن شاءالله
❤️🫶🏽
ردحذف